رحلتي إلى الهند (الجزء الثاني)
لما تسافر بلد معيَّن أكيد راح تلاحظ أشياء مختلفة تلفت انتباهك! ومن الأشياء اللي لفتت انتباهي شيئين لهم علاقة بالستايل ما كنت استخدمهم أبدًا بس حبيتهم وصاروا جزء من مظهري العام.
الشي الأول هو خواتم الرجل! عندهم أشياء جميلة ومن كثر ما هذه العادة متأصلة عندهم وصلت إنهم يسوون خواتم من الذهب والفضة بس لأصابع الرجل، يعني مو بس اكسسوار. واكتشفت إن لها معنى عندهم. فإذا كنتي لابسة خاتم في اصبع الرجل الثاني هذا علامة إنك متزوجة وعلى طول بيسئلونك كم عدد عيالك!
الشي الثاني اللي حبيته وتعلقت فيه هو الشال أو الإيشارب! ألوانه عندهم جدًا جميلة ويعتبرونه من العادات والحشمة إن المرأة تغطي فيه منطقة الصدر، يعني لبس نقدر نقول إنه من التقاليد المنتشره في المجتمع مثل العباية عندنا. كل واحدة تلف الشال بطريقة مختلفة وتختار لون مختلف يميزها عن غيرها، يعني تحول إلى جزء من الستايل العام والموضة!
والحين مع الفقرة الحماسية، فقرة الساري!
أولًا لما رحت اشتري ساري ببساطة رحت محل أقمشة. اخترت كم متر من القماش اللي عجبني (واحد برتقالي وذهبي والثاني بنفسجي وسماوي) وفصلت منهم بلوزة كبداية، بعدين اشتريت تنانير جاهزة بنفس لون الساري عشان تصير كأنها بطانة وباقي القماش يصير هو الساري.
ومن كثر ما إن الساري معقد كان لازم تجي واحدة تلفه علي هذه وظيفتها، إنها تمشي عالبيوت وتلف الساري! أتذكر اسمها كان شانتي معناه السلام.
ما شاء الله عليها سريعة! من كثر ما إنها تلف الساري ألف مرة في اليوم يدها خفيفة تجمع القماش وتخليه طبقات وترميه على شكل حلقة حولك، بعدين تجمعه كله على الكتف الأيسر وتتأكد إنه ثابت بكم مشبك، بعدين تسدل الطبقات مثل الشلال وترتبها!
ملمس الحرير كان رائع وشعور تجربة لبس الساري كانت حماسية وغير!
الهند طبعًا مليئة بالمعابد، وستايل كل معبد يختلف عن الآخر، بعضها مجرد أحجار وآثار قديمة، وبعضها تماثيل دقيقة وملونة تذكرك بالآثار الفرعونية شوي.
ومثل الفراعنة والإغريق القدامى، الهنديين عندهم آلهة خاصة فيهم وبديانتهم الهندوسية. لو اعتبرت آلهتهم كأنها شخصيات مثل هرقل وأطلس وآمون ورع راح تكتشف كيف إن عندهم نفس الشي، وكل إله مخصص لشي. مثلًا لاكشمي آلهة الرزق والثروة عندهم وهانيمان إله الصحة وغاناش إله إزالة العواقب!
الشي الجميل واللي حبيته فيهم، إنه على الرغم من تعدد الآلهة في الديانة الواحدة وتعدد الأديان كمان، لأن فيهم مسيحين ومسلمين، إلا إنهم متعايشين وبينهم سلام وتآلف. يعني ما يمديك ماشي في نفس الشارع تشوف معبد، بعدها بخمس دقايق بتلاقي كنيسة، إذا استمريت في المشي بتلاقي مسجد من غير تعدي على الآخرين أو إيذاء لهم!
فيلم شفته مؤخرًا واعتبره من أفضل الأفلام الهندية اللي مرت علي، لأنه ببساطة ناقش مسألة التعايش اللي عندهم رغم اختلاف الأديان والمذاهب والاعتقادات. اسم الفيلم PK يتكلم عن مخلوق فضائي يجي الأرض عشان يدرسها ويكتشف مسألة الدين، ويحاول يفلسفها ويفهم ليش الناس تعامل غيرها بشكل مختلف وعنصري أحيانًا إذا ما كان يتبع نفس الدين. الفيلم غريب شوي ويمكن ما يتقبله الكل بس الفكرة الأساسية أكثر من رائعة وهو فيلم كوميدي من الدرجة الأولى!
الهند كانت مغامرة رائعة مليئة بالاكتشافات الغريبة والتقاليد والعادات اللي ما كنت أعرفها قبل، وهذه ميزة السفر أو فائدته بشكل أساسي، رغم وجود الإنترنت ورغم إن العالم مفتوح على بعضه والكل صار عنده فكرة عن حضارة الآخر بس الوضع راح يختلف تمامًا لما تزور البلد نفسه!
شاركوني تجربتكم واكتشافاتكم الجديدة عن البلدان اللي زرتوها في التعليقات ;)
No comments:
Post a Comment