رحلتي إلى الهند (الجزء الأول)
في البداية أحب أقولكم شي واحد. لا تعتبرون نفسكم أكلتوا أكل هندي سبايسي حتى تاكلونه في الهند!
بيجيبون فيكم العيد والله، بتحس نفسك قلبت تنين -_-
الزبدة بنرجع لموضوع الأكل بعدين. خلوني أقول لكم ليش رحت الهند أصلًا! بعد ما حبيت اليوغا وصار عندي اهتمام فيها قررت أروح للبلد اللي طلعت منه ووصلت لكل أنحاء العالم من قبل فوق ١٠,٠٠٠ سنة!
أتوقع كنت الوحيدة السعودية على الطيَّارة، الكابتن نفسه - الله يذكره بالخير- كان كل شوي يشيِّك علي من كثر ما كان مستغرب وضعي!
ما علينا، وصلت لأرض الهند بسلام والحمدالله، إجراءاتهم في المطار على فكرة جدًا صعبة، تفتيش محترم وشرطتهم في كل مكان. أتوقَّع حتى هم كانوا مستغربين وضعي!
أول ما تدخل الهند راح تنبهر بجمال طبيعتها، أتوقع ما شفت قبل كذا درجات متعدِّدة من الأخضر بالشكل هذا!
الألوان تجيب السعادة وتخليك مبتسم طول الوقت، ومنتشرة في كل مكان حولك!
في ملابس الناس، على الأرض، في الصور المعلَّقة على الجدران، والساري اللي تتمشى فيه جميلات الهند، كأن عندهم قانون يمنع لبس لون واحد فقط!
طول ما أنت ماشي في الشارع راح تلاقي أشياء كثيرة تلفت انتباهك، من أول الأشياء اللي وقفت عندها وصرت أصورها طول الرحلة هي رسمات الرز! يطحنون الرز حتى يصير مثل بودرة الطباشير ويرسمون فيه رسمات جميلة بتصاميم تبهرك كل مرة، وما تعتبر إعتداء على ملكيات عامة لأن النمل راح يتكفل فيها وياكل الرز وبتختفي بدون ما تسبب أي ضرر لأحد! (شاركت هنا صورة واحدة بس إذا مشيتوا على انستجرامي بتلاقون أكثر من واحدة)
من الفنون الأخرى اللي اكتشفتها بالهند هو فن القيادة! بس هذا فن تبعد عنه وتغنَّي له كمان، حسيت كأني ألعب لعبة قطار الموت من السرعة. لأن كل مرَّة تركب فيها التوك توك عندهم صدِّقني إنت قاعد تغامر بحياتك، مافي أي قانون يمنع أحد إنه يعكس الشارع أو يلف فجأة ورغم هذا كله ما شفت ولا حادث واحد!
(تف تف ما شاء الله لا أعطيهم عين الحين).
الحين خلونا نرجع للأكل (بسم الله *تشمِّر عن ساعديها*) من المتعارف عليه عند أهلي وأصدقائي إن إيثار ما تاكل سبايسي أطلاقًا نهائيًا نيفير! لدرجة إن أمي -الله يحفظها- ملَّت نص الشنطة بسكوتات وخفايف وأكل. فما كنت آكله وما كنت أدري إذا عندي طاقة تحمُّل له أصلًا وما قد توقعت إنِّي راح استمتع بأكله!
بس الحق يقال، أكلهم لذيذ. تنقلب تنين مافيها كلام بس لسَّا لذيذ! أكلت من أكلاتهم التقليدية وجلست على البساط اللي ياكلوا ويناموا عليه، البساطة عندهم هي أساس كل شي لدرجة إنُّهم ياكلون من صحون من خشب تم إعادة تدويره وتصنيعه.
كانوا يعتمدون في أكلهم أكثر شي على الرز والنان أكيد، وجوز الهند، والخضروات بجميع أنواعها مثل البامية والسبانخ، يعني مافي لحم ولا دجاج ولا سمك!
طبعًا محدثتكم بعد ما تحولت إلى فيجتيرين هناك، أول ما نزلت أرض المطار راحت على فايف غايز وهات واحد برغر محترم!
والشاي الهندي شي بديع، يجيبونه في كاس حديد ويالله تقدر تمسك أطرافة من سخونته، بس لذيذ لدرجة ممكن أرجع الهند عشانه مثل ما يمكن أرجع تركيا عشان شاي التفاح اللي عندهم!
خلصنا من الأكل نجي للملابس!
حبيت ملابسهم المريحة والملونة والأقمشة الباردة اللي تخليك تتحمل حرارة الجو أكثر.
والساري؟
الساري سالفة تحتاج جزء ثاني!
انتظرونا في الأسبوع القادم، وشاركوني تجربتكم إنتم في السفر واتركوا لي تعليق سواء رحتوا للهند أو غيرها !
No comments:
Post a Comment